Organizata për Rritjen e Cilësisë në Arsim (ORCA) ka protestuar para Ministrisë së Arsimit për, siç kanë thënë, “tentimin për kapjen e agjencive të pavarura shtetërore nga eksponentët e pushtetit”.
Dibran Hoxha nga kjo organizatë ka thënë se pasi ORCA ka vërejtur se në konkursin e rishpallur për përzgjedhjen e anëtarëve të bordit të AKK-së kishte aplikuar ish-kandidati i VV-së për deputet, Driton Vela, ka vendosur që ta bëjë një hulumtim për punën e tij.
Hoxha ka shtuar se Vela tentoi të mashtronte me CV-në e tij në aplikimin për AKK dhe punën shkencore e të arriturat në të kaluarën.
“Për fat të keq të tij e të mirë të Kosovës, tentativa e Driton Velës për ta kapur këtë pozitë dështoi, meqë përgjatë shqyrtimit të aplikimeve komisioni zbuloi një fakt shokues. Driton Vela kishte tentuar ta mashtronte komisioni duke deklaruar në CV-në e tij dhe në formularin e aplikimit se në vitin 2021 kishte qenë bartës i programit të doktoratës Mjekësi Paraklinike në Universitetin e Prishtinës, kjo e dhënë po të mos zbulohej nga komisioni vlerësues, do të bënte që ai me automatizëm të rangohej më lartë në listën e të rekomanduarve për anëtarë të KSHC-së”, ka thënë ai.
Hoxha ka paraqitur tetë pika, të cilat ka thënë se i ka gjetur gjatë hulumtimit për punën e Velës:
- Driton Vela mashtron kur thotë se ka qenë bartës i programit Mjekësi paraklinike në UP, ai i referohet një dokumenti të brendshëm që quhet RVV (Raport i Vetëvlerësimit) që fakultetet e paraqesin për akreditim pranë KSHC-së, ndërsa KSHC ka marrë vendim që programi të akreditohet pa Driton Velën si bartës, sipas vendimit bartësit e programit janë: Shaip Krasniqi, Hasime Qorraj-Bytygi, Valdetet Topciu-Shufta, Gazmend Kaccaniku dhe Livdana Spahiu.
- Driton Vela nga 13 artikuj të listuar në CV-në e tij, 10 janë review articles, 1 është metaanalizë, dhe vetëm dy janë artikuj shkencorë originalë. -Review articles dhe metaanaliza janë literaturë sekondare; ato nuk prezantojnë të dhëna të reja nga puna hulumtuese eksperimentale e autorit, por ofrojnë analizë ose interpretim të hulumtimit parësor të kryer nga autorë të tjerë.
- Driton Vela është autorë i dy punimeve në revista të botuara nga Frontiers, botues i listuar si i dyshimtë në Listën e Beall.
- “Shkencëtari” Vela nuk ka ndonjë publikim në vitin 2022 dhe 2023 (burimi: Google Scholar dhe Scopus Author Search).
- Driton Vela mashtron në ResearchGate, ku pretendon që ka një laborator “Driton Vela’s lab”. Në këtë laborator listohet një punim i botuar në Faseb Journal, ku ai nuk është fare autor.
- “Shkencëtari” Vela ka marrë pjesë në konferenca të Kosovës, Shqipërisë, Maqedonisë së Veriut, dhe vetëm një në Turqi. Nëse arritjet e tij qenkan aq të njohura, pse nuk ka arritur të depërtojë përtej këtij qarku të ngushtë të vendeve të përmendura.
- Driton Vela mashtron sepse pretendon që përmes teksti të tij mësimor “Fiziologjia e sistemit kardiovaskular” mbulon tërë fushën në fjalë, ndërkaq teksti mbulon vetëm njërën nga fushat e fiziologjisë. Dhe për më tepër libri është i botuar nga Educational Center Kosovo, që boton kryesisht libra për mësim të gjuhëve të huaja.
- Driton Vela mashtron kur në njërën nga paraqitjet publike thotë se doktoratën e ka përfunduar në Shkup. Kjo është e pavërtetë. Ka dhjetëra postime të qasshme për publikun nga Universiteti I Prishtinës, të cilat konfirmojnë përfundimin e doktoratës së Velës në UP.