Presidentja e Kosovës, Vjosa Osmani, në kuadër të vizitës së saj në Çeki, është takuar me kryetarin e senatit çek, Milosh Vystrçil.
Gjatë këtij takimi, Osmani ka adresuar çështjen e liberalizimit të vizave për Kosovën dhe avancimin e agjendës evropiane të Kosovës në mandatin e Çekisë, e cila aktualisht udhëheq me presidencën e Këshillit të Bashkimit Evropian.
“Kosova ka nevojë për rrugë të qartë drejt BE-së gjatë Presidencës Çeke. Mbështetja për procesin e liberalizimit të vizave duhet të jetë në agjendë, sepse është një padrejtësi e madhe ndaj qytetarëve të Kosovës”, ka thënë Osmani.
Po ashtu, presidentja Osmani ka kërkuar edhe përkrahjen e senatit çek për procesin e anëtarësimit në Këshillin e Evropës, duke pasur parasysh rëndësinë e madhe që parlamentarët luajnë në këtë proces, sidomos në Asamblenë Parlamentare të Këshillit të Evropës.
“Presidentja Osmani ka diskutuar me kryetarin Vystrçil për rëndësinë e mbështetjes për anëtarësimin e Kosovës në Partneritetin për Paqe e më pas në NATO”, vijon njoftimi.
Në takim me kryetarin Vystrçil, Osmani ka theksuar se Kosova e konsideron Republikën Çeke si aleate të rëndësishme, me të cilën ndajnë vlera dhe vizion të përbashkët për paqe, prosperitet dhe integrim euroatlantik.
Të dy janë pajtuar për zgjerimin dhe thellimin e marrëdhënieve bilaterale, sikurse edhe në forcimin e diplomacisë parlamentare ndërmjet dy vendeve.