Presidentja e Republikës së Kosovës, Vjosa Osmani, ka takuar presidentin e Shteteve të Bashkuara të Amerikës, Joe Biden.
“Aleanca e lirisë. Aleanca e përjetshme”, ka shkruar Osmani në një fotografi që e ka publikuar në Facebook.
Në fotografinë e publikuar nga Osmani, shihet se të dy presidentet ia mbajnë fort dorën njëri-tjetrit, duke treguar aleancën në mes të dy vendeve.
Përveç me Biden, Osmani disa ditë më parë është takuar me sekretarin e shtetit të ShBA-së, Antony Blinken dhe me këshilltarin e lartë amerikan të shtetit, Derek Chollet, gjatë qëndrimit të saj në New York.
Presidentja Osmani, nga 17 shtatori gjendet në New York, ku ka zhvilluar takime me liderë botërorë dhe organizata ndërkombëtare. Vizita po zhvillohet në kuadër të sesionit të 78-të të Asamblesë së Kombeve të Bashkuara.