Ish-këshilltari i Thaçit, Artan Behrami, pas përfundimit të bastisjes së banesës së tij, para mediave ka thënë se bastisje të tilla kanë qëllim frikësimin e qytetarëve.
“Ata nuk vijnë për të marrë diçka por për të tërhequr vëmendje mediale dhe për të ndjellë frikë. Por ne nuk jemi frikësuar as në luftë e as nga regjimi i Millosheviqit e as nuk i frikësohemi as kësaj Prokurorie”, ka thënë Behrami, duke shtuar se janë krenar me punën që kanë bërë me ish-presidentin Hashim Thaçi.
Ai ka thënë se Dhomat e Specializuara në Hagë nuk mund t’i bastisin 1.8 milionë banorë që kundërshtojnë këtë Gjykatë dhe se veprimet e fundit kanë për synim tërheqjen e vëmendjes mediale.
Ish-këshilltari i Thaçit ka shtuar se Dhomat e Specializuara në Hagë më shumë “po investojnë në propagandë se sa në vënie të drejtësisë”.
“Dhomat e Specializuara në Hagë më shumë po investojnë në propagandë se sa në vënie të drejtësisë. Nuk dua të hy në detaje se çfarë janë konfiskuar por të gjithë qytetarët e Kosovës janë cak i bastisjeve por dua ta theksoj se nuk ka Polici që mund t’i bastis 1.8 milion banorë në Kosovë e as nuk ka prokurorë për të shkruar shkresa për këta banorë”, ka shtuar ai.
Prokuroria e Gjykatës Speciale ka bastisur sot banesën e ish-këshilltarit të Hashim Thaçit, Artan Behrami.
Lexo dhe: Specialja bastis shtëpinë e ish-këshilltarit të Thaçit, Artan Behrami
Zyra e Prokurorit të Specializuar i ka konfirmuar bastisjet në shtëpitë e tre ish-këshilltarëve të Hashim Thaçit, Blerim Shala, Bashkim Smaka dhe Artan Behrami.
Në një përgjigje për Dukagjinin, ata kanë konfirmuar, por nuk kanë dhënë detaje në lidhje me rastin.
Lexo dhe: Prokuroria Speciale i konfirmon bastisjet e fundit në Kosovë
“Faleminderit për komunikimin tuaj. Zyra e Prokurorit të Specializuar (SPO) është duke zhvilluar operacione të vazhdueshme në Kosovë. Operacionet e PSP-së po mbështeten nga Policia e Kosovës dhe Misioni i Bashkimit Evropian për Sundimin e Ligjit në Kosovë (EULEX)”, thuhet në përgjigje.
Kujtojmë që dje (e hënë) janë bastisur shtëpitë edhe të dy ish-këshilltarëve tjerë të Thaçit, Blerim Shalës dhe Bashkim Smakës.