Kryeprokurori i suspenduar i Gjakovës, Ramiz Buzhala, është personi i fundit brenda sistemit prokurorial, ndaj të cilit po zhvillohen procedura disiplinore.
Kërkesë për inicim të procuedurës disiplinore, Këshilli Prokurorial ka pranuar edhe për shtatë prokuror të tjerë.
Megjithatë, nga KPK-ja nuk i ka dhënë detaje Televizionit Dukagjini se për cilat raste po zhvillohen hetime ndaj prokurorëve.
Vitin e kaluar, Këshilli, ka shqyrtuar 14 kërkesa për fillim të procedurës disiplinore, prej të cilave në dy raste ka shqiptuar vërejtje, kurse në të tjerat ose janë liruar nga përgjegjësia ose janë bartur për vitin 2022.
Labinot Leposhtica nga BIRN, tregon se prokurorët dhe gjyqtarët procedurat disiplinore shpesh i kthejnë në favor të tyre.
“Shpesh në Kosovë procedura disiplinore përdoret si një shmangje për t’i ikur përgjegjësisë penale… Sanksionet disiplinore këtu janë shumë të buta, edhe në fakt pothuajse asnjëherë nuk e pasqyrojnë peshën e veprimit të gjyqtarëve dhe prokurorëve, e kjo në instancë të fundit e dëmton edhe më tej besimin e qytetarëve në mekanizmat e brendshme të Këshillit Gjyqësor dhe atij Prokurorial”, ka thënë Leposhtica.
Një veprim të tillë, tentoi ta bënte edhe kryeprokurori i suspenduar i Gjakovës, Ramiz Buzhala.
Buzhala gabimisht ia kishte dërguar mediumit kallxo.com pyetjet e një testi të Prokurorisë, çka bëri që ai të suspendohet.
“Konsideroj që do të duhej të kishte vend të paktën për ndonjë hetim penal, me e pa se si ka rrjedhë rasti. E çka ka ndodhë në praktikë është që atij i është ofruar gjatë procedurës së negocimit një marrëveshje për transferim në Prokurorinë Themelore të Prizrenit, në Departamentin e Krimeve të Rënda, çka unë do ta cilësoja si një shpërblim e jo si një sanksion disiplinor”, ka shtuar ai.
Në mbledhjen e fundit të Këshillit, kjo marrëveshje nuk ka kaluar.
Sikur KPK-ja, edhe Këshilli Gjyqësor ka themeluar disa panele hetimore gjatë këtij viti.
Nga 16 panelet, KGJK-ja ka ranuar 12 raporte me fakte dhe prova të mbledhura, përderisa për Televizionin Dukagjini kanë treguar se i kanë shqyrtuar nëntë prej tyre.
Prej tyre, vetëm një raport për shkak të parashkrimit është hëdhur poshtë, kurse në tetë të tjera janë shqiptuar sanksione disiplinore, mes tyre edhe ulje e pagës prej 30% për katër muaj për kryetaren e Themelores së Mitrovicës, Liljana Stevanoviq.
Ajo u dënua pasi mori pjeë në mbledhjen e Këshillit të Sigurisë në Serbi.