Pas protestës së veteranëve, ku u arrestua kryetari i Partisë Social Demokrate, Dardan Molliqaj, partia PSD kanë reaguar, në rrjetet sociale.
Sipas tyre aktivistët e PSD-së janë arrestuar dhunshëm, me grushte dhe me sharje.
“Policia e Kosovës arreston me dhunë, grushte e me sharje aktivistët e PSD-së menjëherë pas protestës së veteranëve të UÇK-së. Pushtetit po i pengon protesta e veteranëve. Nuk ka arsyetim tjetër për mllefin e zellin për dhunë që e përdorën sot”, shkruhet në postimin e tyre.
PSD, kanë bërë të ditur se aparatura është vënë në funksion të përndjekjes së opozitës.
Ndërkaq ata kanë thënë se arrestimi i Dardan Molliqajt është i paligjshëm sepse ka shkelur procedurat e kodit penal në fuqi.
“Aparatura shtetërore është vënë në funksion të përndjekjes së opozitës. Arrestimi i Dardan Molliqajt është i paligjshëm sepse ka shkelë procedurat e kodit penal në fuqi. Arrestimi i aktivistëve të tjerë pos që nuk ka arsyetim, është bërë dhunshëm, me rrahje, kërcënime e sharje nga policia”, shkruhet tutje në postim.
Partia Social Demokrate ka kërkuar lirimin e menjëhershëm të Dardan Molliqajt, si dhe aktivistëve, Frashër Krasniqi dhe Zgjim Hyseni, që u arrestuan pas protestës së veteranëve.