Kryeministri i Shqipërisë Edi Rama, ka treguar sesi projekte siç i quan ai projekte vizionare janë në fokusin e kompanive të mëdha ndërkombëtare të cilat sipas tij brenda 48 orësh rreth 30 kompani kanë shprehur interesin për tu njoftuar me projektin e Portit të Ri të Durrësit në Porto Romano.
Sipas kryeministrit të Shqipërisë një interesim i tillë i kompanive të mëdha ndërkombëtare para disa vjetëve ka qenë utopike të mendohej.
“Përpara 48 orësh rreth 30 kompani të mëdha ndërkombëtare erdhën në Shqipëri për t’u njohur me projektin e Portit të Ri të Durrësit në Porto Romano, një prurje sipërmarrjesh të huaja që deri para ca vitesh as nuk imagjinohej” ka shkruar Rama në FaceBook.
Më tej ai ka treguar se edhe në projektin e për ndërtimin e Auto Motoparkut në Elbasan e ka fituar “kompania e ish-pilotit të famshëm austriak të Formula 1 Alexander Wurz dhe babait të tij Franz Wurz, një personalitet i mirënjohur për nismat e tij në fushën e sigurisë rrugore”, ka shtuar ai.
Më poshtë mund ta lexoni postimin e plotë të kryeministrit të Shqipërisë Edi Ramës.
Përpara 48 orësh rreth 30 kompani të mëdha ndërkombëtare erdhën në Shqipëri për t’u njohur me projektin e Portit të Ri të Durrësit në Porto Romano, një prurje sipërmarrjesh të huaja që deri para ca vitesh as nuk imagjinohej.
Sot katër kompani projektimi mes më të mëdhave të botës, për cirkuitet automobilistike ishin në Tiranë për konkursin ndërkombëtar të shpallur nga #DPSHTRR për Auto Motoparkun që do të ndërtojmë në Elbasan.
Të katërta me projekte vizionare dhe prezantime mbresëlënëse nga vetë drejtuesit e kompanive, të cilat ishin përgatitur shumë seriozisht edhe pse praktika e zgjedhur ishte më e pazakonshmja, pa asnjë pagesë paraprake.
Në 48 orë këto janë dy prova shembullore të imazhit të ri të Shqipërisë, interesimit në rritje për vendin tonë si një destinacion interesant, jo vetëm për turizëm po edhe për biznes, si dhe rritjes së besueshmërisë tek Shqipëria që ka çelur negociatat me BE, e që sot ka një reputacion ndërkombëtar krejt tjetër nga ai i deri disa viteve më parë.
Konkursin e sotëm e fitoi kompania e ish-pilotit të famshëm austriak të Formula 1 Alexander Wurz dhe babait të tij Franz Wurz, një personalitet i mirënjohur për nismat e tij në fushën e sigurisë rrugore.