Raporti 24-orësh i Policisë së Kosovës ka evidentuar disa raste të dhunës në familje të ndodhura gjatë ditës së enjte në Prishtinë dhe Obiliq.
Në një rast të raportuar në orën 02:45 në Prishtinë, një shtetase e Shqipërisë dhe ish-i dashuri i saj, një mashkull kosovar, janë përfshirë në një përleshje pas një mosmarrëveshjeje. Të dy palët janë shoqëruar në stacionin policor, ku pas iniciimit të procedurës dhe konsultimit me prokurorin, janë liruar në procedurë të rregullt.
Në Obiliq, policia ka arrestuar një mashkull kosovar nën dyshimin se ka ushtruar dhunë fizike ndaj bashkëshortes së tij. Viktima ka marrë trajtim mjekësor, ndërsa i dyshuari, pas inicimit të rastit dhe me vendim të prokurorit, është liruar në procedurë të rregullt.
Ndërkohë, rasti i tretë i raportuar në Prishtinë rreth orës 14:30 ka përfshirë një viktimë femër dhe të dyshuarin mashkull kosovar, të cilët kanë deklaruar se kishin pasur një mosmarrëveshje familjare. Pas intervistimit, lënda është proceduar për trajtim të mëtejshëm në procedurë të rregullt.
Policia apelon për raportim të menjëhershëm të çfarëdo forme të dhunës në familje për të parandaluar përshkallëzimin e rasteve dhe mbrojtjen e viktimave.