Shefi i Grupit Parlamentar i Partisë Demokratike të Kosovës, Abelard Tahiri, ka thënë se komisioni hetimor parlamentar lidhur me procedurat për furnizimin dhe menaxhimin me rezervat shtetërore, si dhe keqpërdorimet dhe abuzimet e mundshme me rezervat shtetërore, tashmë është i themeluar, veç se i njëjti duhet të formalizohet nga kryetari i Kuvendit të Kosovës, Glauk Konjufca.
Kështu u shpreh ai në fjalën e tij në seancën e Kuvendit të Kosovës, teksa thotë se PDK-ja e mbështet këtë iniciativë.
“PDK e mbështet këtë iniciativë, por nuk është iniciues. Jemi të gatshëm dhe heqim dorë për çfarëdo mëditje nga këto komisione vetëm të bëhet puna e këtij komisioni. Pse është e rëndësishme të ketë komision hetimor parlamentar. Ka shumë çështje politike që kanë çu deri te marrja e këtij vendimi. Janë dy forma të themelimit të komisionit, me 6 deputetë dhe me 40 deputetë apo 1/3 e deputetëve të Kuvendit të Kosovës. Ky komision tashmë është i themeluar, s’ka nevojë as për votim, as për formalizim për një komision të tillë. Ky vendim duhet të formalizohet nga kryetari i Kuvendit me emrat që i kemi dërguar. Themelimi i këtij komisioni është obligim që duhet ta përmbyllë kryetari i Kuvendit që është i iniciuar nga 41 deputetë. Kjo është një çështje shumë e qartë”, u shpreh ai.
Ndryshe, deputeti i Lidhjes Demokratike të Kosovës, Arben Gashi, ka paraqitur para deputetëve propozimin për formimin e komisionit hetimor parlamentar lidhur me procedurat për furnizimin dhe menaxhimin me rezervat shtetërore, si dhe keqpërdorimet dhe abuzimet e mundshme me rezervat shtetërore, nëpërmjet kualifikimit të procedurës si sekret shtetëror për furnizime të tilla.
Në seancën e Kuvendit të Kosovës, Gashi propozoi formimin e këtij komisioni në emër të 41 nënshkruesve.
Duke pasur parasysh indicet përtej dyshimit të bazuar për abuzime të mundshme të ndërlidhura me procesin e furnizimit me rezerva shtetërore e konsiderojmë të nevojshme që të bëhet hetim i thelluar parlamentar”, tha Gashi.
Ai konsideron se është e domosdoshme që të ketë hetim parlamentar për të parë nga afër sa janë respektuar ligjet dhe procedurat për çështjen e rezervave shtetërore.