Një sulm me dronë në një akademi ushtarake siriane në qytetin perëndimor të Homsit ka shkaktuar vdekjen e të paktën 100 personave, sipas një grupi monitorues.
Dronët e ngarkuar me eksploziv kishin synim një ceremoni diplomimi, ku morën pjesë familjet e kadetëve, dhe në mes të viktimave ishin të përfshirë gra dhe fëmijë.
Ushtria siriane ka akuzuar “grupet terroriste të mbështetura nga forcat e njohura ndërkombëtare” për sulmin.
Nuk ka pasur asnjë pretendim të menjëhershëm nga rebelët dhe xhihadistët që janë përfshirë në luftën civile të vendit dhe që luftojnë kundër qeverisë. Sulmi me dronë besohet të jetë nisur nga zonat që janë nën kontrollin e opozitës në veriperëndim të Homsit.
Pas sulmit, Helmetat e Bardha raportuan se pesë civilë janë vrarë në sulmet intensive të artilerisë dhe raketave të qeverisë në disa qytete, qyteza dhe fshatra në provincën Idlib, një zonë që është një bastion i opozitës.
Agjencia shtetërore e lajmeve siriane, Sana, ka cituar një deklaratë nga Komanda e Përgjithshme e Forcave të Armatosura, të cilat thonë se disa dronë me eksplozivë kanë shënjestruar akademinë ushtarake të Homsit menjëherë pas përfundimit të ceremonisë së diplomimit në orët e pasdites.
Po ashtu, nga ana e tyre thuhet se forcat e armatosura “e konsiderojnë këtë akt një akt kriminal të paprecedentë dhe pohon se do t’u përgjigjen me forcë dhe vendosmëri këtyre grupeve terroriste kudo që ndodhen”, raporton BBC.
Një raport i mëvonshëm citon ministrin e Shëndetësisë, Hassan al-Gabbash, i cili thotë se sulmi ka plagosur më shumë se 200 njerëz dhe se në mes të vdekurve janë gjashtë gra dhe gjashtë fëmijë. Një dëshmitar ka treguar se pas ceremonisë, njerëzit janë zbritur në oborr dhe eksplozivi ka goditur.
Një video grafike tregon pasojat e sulmit, duke paraqitur dhjetëra viktima dhe të afërmit e tyre që bërtisnin për ndihmë brenda një terreni të madh me mure, dhe dëgjohen edhe të shtëna me armë zjarri në sfond.
Observatori Sirian për të Drejtat e Njeriut (SOHR) raporton se ministri i Mbrojtjes i Sirisë mori pjesë në ceremoninë e diplomimit, por u largua disa minuta para sulmit.
Ky sulm ndodh në kontekstin e një lufte civile të gjatë në Siri, që nisi pas goditjes së dhunshme të demonstratave paqësore prodemokratike në vitin 2011 nga presidenti Bashar al-Assad.
Lufta ka shkaktuar vdekjen e më shumë se gjysmë milion njerëzve, ndërsa mbi 6.8 milionë janë të zhvendosur brenda vendit dhe gjashtë milionë të tjerë janë refugjatë ose azilkërkues jashtë vendit.