Presidenti i Serbisë, Aleksandër Vuçiq, bisedimet në takimin me përfaqësuesin e lartë të BE-së për politikë të jashtme dhe siguri, Josep Borrell, dhe me emisarin e BE-së për dialog, Miroslav Lajçak, i ka quajtur të vështira.
Kështu shkroi shkurtimisht ai në një postim në llogarinë e tij në Instagram, duke thënë se bisedimet e vështira në Bruksel sapo kanë nisur.
“Bisedimet e vështira në Bruksel sapo kanë filluar”, shkroi ai.
View this post on Instagram
Ndryshe, në Bruksel po zhvillohen takime fillimisht ndaras e më pas për të vazhduar me takimin e përbashkët.
Temë diskutimi ky takim do të ketë zbatimin e Marrëveshjes për normalizimin e marrëdhënieve.
Takimi vjen në kohën e tensioneve të larta në veri të Kosovës. Situata atje është acaruar qysh nga fundi i majit.
Atëkohë, grupe serbësh kishin nisur protestat për të kundërshtuar vendosjen e kryetarëve shqiptarë – nën përcjelljen e policisë – në zyrat e komunave në veri.
Këta kryetarë kanë dalë nga zgjedhjet e jashtëzakonshme të prillit që janë mbajtur në Mitrovicë të Veriut, Zveçan, Zubin Potok dhe Leposaviq, por që janë bojkotuar nga popullata lokale serbe.