Ministri i Punëve të Jashtme të Serbisë, Nikola Selakoviq, e ka cilësuar si “të tmerrshëm” moslejimin e Vuçiqit brenda Kroacisë, vizitë e paparalajmëruar nga ana e tij.
Në një konferencë për media, Ministri Selakoviq ka thënë se tashmë, ambasadës së Kroacisë në Beograd i është dërguar një notë proteste lidhur me këtë vendim.
Një e tillë është shpërfillur nga shteti kroat.
Ndër të tjera, Selakoviq lexoi notën që Ministria serbe tentoi t’ia dorëzonte Ambasadës së Kroacisë në Beograd.
“Ministria e Punëve të Jashtme e Republikës së Serbisë është e tronditur nga vendimi i paligjshëm, antieuropian dhe anticivilizues i Ministrisë së Punëve të Jashtme dhe Europiane të Republikës së Kroacisë, i cili, bazuar në vullnetin e shprehur arbitrarisht të autoriteteve kroate dhe shkeljen e rëndë të parimit të lirisë së lëvizjes, ndalon ardhjen e Presidentit të Serbisë në Jasenovac, vendi ku u vranë qindra njerëz të pafajshëm, viktima të kombësive serbe, hebreje, rome dhe të tjera”, ka lexuar Selakoviq.
Ministri i Punëve të Jashtme të Kroacisë, Gordan Grliq Radman, ka thënë se e kishte kuptuar në formë jozyrtare vizitën që Vuçiq po planifikonte të realizonte në Jasenovacin dhe Pakracin.
“Sipas informacioneve jozyrtare, kemi marrë vesh se presidenti i Serbisë, përveç vizitës së mëparshme në Donja Gradina, do të vizitonte edhe zonën e Jasenovacit, në Pakrac dhe nuk dimë në cilat vende të tjera. Këtë e mësuam përmes kanaleve jozyrtare, që në fakt është e pazakontë në komunikim dhe e konsiderojmë të papranueshme këtë mungesë të komunikimit zyrtar dhe procedurës diplomatike. Të premten pasdite e kemi dorëzuar notën e protestës në ambasadën e Serbisë”, ka thënë Grliç.
Ndër të tjera, të dielën, Vuçiq kishte planifikuar që ta vizitonte privatisht Jasenovacin dhe Pakracin, por autoritetet kroate nuk e lejuan të hynte.
Vizita e tij është cilësuar si “një mundësi për të krijuar kaos” nga qeveria kroate, raporton gazeta kroate “Jutarnji list”.