Ish-shefi i Misionit Verifikues të OSBE-së në Kosovë, ambasadori në pension William G. Walker, u është drejtuar me një letër liderëve të partive politike të përfaqësuara në Kuvendin e Kosovës, duke propozuar Faton Bislimin si kandidat për President të Kosovës.
Letra, të cilën e ka siguruar Telegrafi, vjen në kohën kur procesi për zgjedhjen e Presidentit të ri të Kosovës vazhdon të jetë i bllokuar.
Walker shpreh shqetësimin e tij për, siç e cilëson, “bllokadën e tejzgjatur të procesit kushtetues” dhe vlerëson se zgjedhje të reja nuk do të sillnin domosdoshmërisht zgjidhje për situatën politike në vend.
“Si mik i Kosovës, jam thellësisht i shqetësuar, ashtu siç jam i bindur se jeni edhe ju dhe qytetarët e Kosovës, për bllokadën e tejzgjatur të procesit kushtetues për zgjedhjen e Presidentit të ri”, thuhet në letrën e tij.
Diplomati amerikan thotë se ka dëgjuar emrat e disa kandidatëve të mundshëm, por sipas vlerësimit të tij, asnjëri nuk i përmbush në tërësi aftësitë, përvojën dhe profilin personal që, sipas tij, kërkon posti i Presidentit.
Për këtë arsye, Walker propozon emrin e Faton Bislimit, të cilin thotë se e njeh prej shumë vitesh dhe me të cilin ka diskutuar për politikën e Kosovës, si dhe për pozitën e vendit në Evropë dhe në botë.
Walker vlerëson se Bislimi ka aftësi të veçanta për të ushtruar detyrën e Presidentit, duke veçuar përvojën e tij ndërkombëtare, formimin akademik, aftësitë komunikuese dhe njohuritë për procesin e shtetformimit të Kosovës.
Sipas tij, Bislimi ka jetuar, udhëtuar dhe studiuar në vende të ndryshme të Evropës dhe Amerikës së Veriut, ndërsa studimet e tij në Kosovë, Shtetet e Bashkuara dhe Kanada i cilëson të nivelit të lartë.
Walker përmend gjithashtu aftësitë e tij në komunikim dhe njohjen e gjuhëve shqipe dhe angleze, ndërsa thotë se, sipas dijenisë së tij, Bislimi zotëron edhe frëngjishten.
Në letër, ish-shefi i Misionit Verifikues të OSBE-së në Kosovë thekson edhe njohuritë që Bislimi ka për historinë politike të Kosovës dhe procesin e shtetformimit para, gjatë dhe pas luftës së viteve ’90.
Një tjetër element që Walker e konsideron të rëndësishëm është personaliteti i Bislimit, duke e përshkruar atë si person me aftësi të mira sociale, i cili di të jetë serioz kur kërkohet dhe të përdorë humorin kur situata e lejon.
Walker e cilëson Bislimin edhe si kandidat potencial të konsensusit, duke argumentuar se Kosova ka nevojë për një President që perceptohet si përfaqësues i të gjithë vendit dhe jo i një partie politike apo individi.
“Fatoni nuk përfaqëson interesa partiake. Ai përfaqëson bindjet e veta dhe përkushtimin për një Kosovë më të mirë”, shkruan Walker.
Në fund të letrës, diplomati amerikan kërkon nga liderët politikë që emri dhe kualifikimet e Faton Bislimit të merren në konsideratë gjatë diskutimeve për zgjedhjen e Presidentit të Kosovës.
Sipas informacionit të publikuar, letra u është dërguar liderëve të të gjitha partive politike të përfaqësuara në Kuvend. Megjithatë, deri në publikimin e saj, nuk është konfirmuar nga LVV, PDK, LDK apo AAK nëse letra ka arritur në adresat e tyre.