Për analistin Visar Ymeri, vizita e kryeministrit të Kosovës, Albin Kurti, e realizuar në maj, ka ndodhur për dy arsye.
Sipas tij, kjo lidhet me nënshkrimin e kontratës me Korporatën Sfidat e Mijëvjeçarit (MCC), dhe me presionin publik karshi kryeministrit.
“Ka vendosur të shkojë në maj, ta shfrytëzojë nënshkrimin e kontratës me MCC-në, dhe ta bëjë një vizitë të gjerë atje sepse është parë se presioni publik karshi kësaj çështje i ka dhembur. Më mirë është ta durosh atë presion, më mirë është të presësh sesa të shkosh e të bësh kësi lloj vizite”, është shprehur Ymeri në “Debat Plus”.
Ai ka renditur tri arsye pse kryeministri Kurti nuk është pritur nga niveli i lartë.
“Kjo lidhet me tri çështje të rëndësishme, arritja e marrëveshjes me Serbinë, për ta mbyllur këtë çështje përgjithmonë, është shtuar urgjenca e marrëveshjes mes dy vendeve, e dyta është diversifikimi i burimeve energjetike, që lidhen me projektin e gazit, për të cilin qeveria është vonuar të marrë vendim, kanë shprehur hamendësime rreth këtij projekti derisa i ka kaluar afati, dhe e treta janë integrimet rajonale”, shtoi ai.
Në anën tjetër, Zgjim Hyseni i Partisë Socialdemokrate (PSD), ka theksuar se ka indikacione që “jemi duke shkuar drejt Status-quos”.
Sipas tij, diskursi që dominon aktualisht në radhët e kritikëve të qeverisë është te fakti se kryeministri nuk është pritur nga autoritetet e lartë të krerëve të shtetit amerikanë dhe kjo është në vetvete kritikë.
“E vërteta qëndron po ashtu se edhe sikur të pritej kritika do të ishte se i ka ngrënë fjalët e veta dhe tani po shkojmë drejt kompromiseve, prap do të kishte kritikë”, shtoi ai.
“Nuk është e thënë që Amerika të na pret si jemi mësuar ne, mos të ishte procesi i dialogut një lloj pune me rëndësi, munden të ndërrohen dy apo tre kryeministra këtu pa e pasur aasnjë pritje atje”.
Për Hysenin, vizitat i kanë kryesisht dy dimensione, atë ceremonial dhe të përmbajtjes.
“Nëse mundemi të nxjerrim një konkluzion është se këto janë indikacione që jemi duke shkuar drejt status-quos. Nuk pretendoj se mund të parashikoj se çka do të shkojë kjo punë. Problemi im me Kurtin është se po kundërshton ndërkohë nuk e ka asnjë projekt se kah do të shkojë me procesin e dialogut”.
Ndërkaq, për analistin Dardan Gashi, vizita e Kurtit ishte pa asnjë takim serioz në Shtetet e Bashkuara të Amerikës.
“Sa i përket vizitës së Kurtit në SHBA, ai e ka turpëruar komplet një shtet, një vend me këtë maskaradë që e ka bërë”, është shprehur Gashi.