Nënkryetarja e Kuvendit të Kosovës, Saranda Bogujevci të shtunën e 15 tetorit ka marrë pjesë në konferencën për shënimin e Javës së Njeriut me Shkop të Bardhë, e cila është mbajtur në Prishtinë.
Në këtë konferencë Bogujevci është shprehur se është e vetëdijshme për faktin që personat me aftësi të kufizuar përballen çdo ditë me sfida të llojllojshme. Kjo sipas saj vijon si mungesë e arsimit, punësimit, burimit social e të tjerë.
Nënkryetarja e kuvendit ka thënë se si institucione nuk do të duhej të mjaftonte vetëm një ditë që të flasim për sfidat me të cilat kjo kategori ballafaqohet çdo ditë.
Mes tjerash Bogujevci ka shtuar se nga 200 shërbyes civilë në kuvend, gjashtë prej tyre janë persona me aftësi të kufizuara, sipas saj kjo shifër nuk duhet të mjaftojë.
Bogujevci ka theksuar se kuvendi ka planifikuar përgatitjen e dokumenteve parlamentare në këtë aspekt. Sipas saj kjo do të arrihet duke zbatuar praktikat globale për përfshirjen sa më të gjerë të të gjithë grupeve të shoqërisë në qasjen në informata. Nëpërmes të cilës mundësohet pjesëmarrja aktive në vendimmarrje, e demokracia kuptimësohet kur ka gjithëpërfshirje në vendimmarrje.