Është paraqitur kërkesa për caktimin e masës së paraburgimit ndaj të pandehurit L.G nga Prokuroria Themelore në Prishtinë si shkak i veprës penale të mashtrimit me ç’rast, i njëjti kishte arritur shumën prej 500 mijë eurosh.
Bazuar në njoftim dhe njëherit, në kërkesën e Prokurorisë, ekziston dyshimi i bazuar se i pandehuri i lartcekur, nga muaji gusht i vitit 2020 dhe në vazhdimësi, me qëllim të përfitimit të dobisë pasurore për vete me anë të premtimit të rrejshëm se paratë e investuara në kripto valuta do t’iu kthehen të dëmtuarve së bashku me fitimin e tyre, ka marrë shuma të ndryshme të parave nga të dëmtuarit në shumën rreth 500 mijë eurosh.
Krahas hetimeve, më 12 tetor të këtij viti, Prokurori i Shtetit ka ndaluar dy persona të dyshuar të përfshirë në rastin e njëjtë dhe ka kërkuar masën e paraburgimit ndaj tyre, në të cilën ndodhen aktualisht.
“Vlen të ceket se në këtë çështje penale, Prokurori i Shtetit ka aplikuar masat e fshehta teknike të hetimit dhe vëzhgimit, me ç’ rast më 12 tetor 2022, ka ndaluar dy (2) persona të dyshuar të përfshirë në rastin e njëjtë dhe ka kërkuar masën e paraburgimit ndaj tyre, nën të cilën masë ndodhen aktualisht”, thuhet në njoftim.
Bëhet e ditur se hetimet janë duke vazhduar.