Asociacioni i Gazetarëve të Kosovës (AGK) ka reaguar pas sulmit ndaj gazetarëve nga protestuesit lokalë serbë.
AGK ka kërkuar që Policia e Kosovës të ndërmarrë hapa për sigurinë e gazetarëve dhe kameramanëve.
“Asociacioni i Gazetarëve të Kosovës i bën thirrje urgjente Policisë së Kosovës dhe prezencës ndërkombëtare në këtë komunë, që t’u ofrojnë siguri gazetarëve dhe kameramanëve, të cilët janë duke qëndruar në atë komunë. AGK-ja dënon ashpër këtë sulm, njëherësh bën të ditur se për të gjitha këto sulme që kanë ndodhur në veri të vendit, do të informohen organizatat ndërkombëtare që merren me sigurinë e gazetarëve dhe lirinë e medias”, thuhet në njoftimin e AGK-së.
Në një përgjigje për AGK-në, gazetarja e cila ishte prezente me kameramanin, ka treguar se kameramani ka pësuar lëndime në kokë dhe trup.
“Na kanë gjuajtur me gurë, disa kolegë derisa kanë qenë duke u larguar, janë rrëzuar dhe kameramanit tonë, Bardh Bekteshi, e kanë shtyrë duke e rrëzuar, pastaj edhe sulmuar fizikisht, duke i shkaktuar lëndime në kokë dhe trup”, ka thënë Venera Xhoxhaj për AGK-në.
Gazetarë të tjerë janë sulmuar me gurë.