“Maledictus” apo “I Mallkuari” është libri më i ri i shkrimtarit dhe i filozofit, Flodian Maloku, që do të jetë në duart e lexuesve javën e ardhshme.
Këtë e ka bërë të ditur vetë Maloku përmes një postimi në Facebook, ku ka ndarë edhe një pjesë nga libri i cili është ende në shtyp.
“Në lumin e ekzistencës së rëndomtë njerëzore, aty ku supozojmë që dita i ka ikur predeterminimit sizifian, njeriu rikthehet te shqetësimi i tij, te brenga e tij, te fundamenti, te dhuntia me të cilën natyra e pajisi vetëm atë, rikthehet dhunshëm në procesin e mendimit. Teksa nëpër damarët sipërfaqësorë të shoqërive të cilat ndjekin pas shfaqjen e dukjen, e jo thelbin e esencën, sillet një fantazmë që shpërndan fjalinë: “Të mendosh do të thotë të mos rrish rahat”! Ndërkaq cila qenie njerëzore e thjeshtë, me idealet e lashta mbi lumturinë e jetën e shëndoshë, kërkon të mos jetë rehat, i vë vetes në kurriz barrën e këtij fati, fatin e mendimit.”