Një rast i tentim vrasjes ka ndodhur të dielën në fshatin Vitomiricë të Pejës.
Sipas njoftimit të Policisë, viktima ishte duke drejtuar veturën e tij, kur nga një lokal, dy të dyshuar meshkuj kosovarë kanë shtënë me armë zjarri ndaj tij.
Si rezultat, vetura e viktimës është goditur nga predhat e fishekëve në pjesën e pasme.
Në vendin e ngjarjes, njësitet relevante policore kanë gjetur dhe sekuestruar 8 gëzhoja të fishekëve të armës së zjarrit.
Përveç dëmeve materiale në veturë, nuk raportohet për të lënduar.
“Vitomiricë – Pejë. 10.12.2023 – 01:20. Viktima mashkull kosovar ka raportuar se derisa kishte qenë duke e drejtuar veturën, nga një lokal dy të dyshuar meshkuj kosovarë kishin shtënë me armë zjarri dhe si pasojë vetura e tij në pjesën e pasme ishte goditur nga predhat e fishekëve. Njësitë relevante policore kanë dalë në vendin e ngjarjes ku kanë gjetur dhe sekuestruar 8 gëzhoja të fishekëve të armës së zjarrit. Përveç dëmeve materiale, nuk raportohet për të lënduar”, thuhet në raportin 24-orësh të Policisë.
Policia ka bërë të ditur se dy të dyshuarit me iniciale K.K., i lindur në vitin 2003 dhe Gj.K., i lindur më 2006, janë vetëdorëzuar.
Të dyshuarit tashmë janë dërguar në mbajtje pas intervistimit me vendim të prokurorit.