Kryetari i Aleancës për Ardhmërinë e Kosovës (AAK), Ramush Haradinaj, është shprehur i shqetësuar për fatin e Kosovës. Ai ka thënë se vendi tani është futur në një fazë vendimtare politike dhe se i duhet dhënë fund “keqqeverisjes” së Albin Kurtit.
Sipas Haradinajt, vendi po rrezikon humbjen e gjërave që i ka arritur deri më tani, përfshirë edhe miqësinë me SHBA-në.
Andaj, kreu i AAK-së konsideron se në këtë situatë duhet dhënë fund “qeverisë antishtet të Albin Kurtit”.
Përmes një postimi në Facebook, Haradinaj informon se sot Kryesia e AAK-së në Pejë ka nisur “ciklin e diskutimeve për veprimet konkrete të mobilizimit të saj dhe të shtrirjes e të forcimit të Bashkimit”, i cili sipas tij, “tashmë e ka krijuar bërthamën e vet me Nismën Social-Demokrate, Klubin e Intelektualëve E-30 dhe me Listën Konservatore”.
“Ky bashkim politik do të rritet dhe nuk do të ndalemi deri sa ta krijojmë masën kritike që i jep fund kësaj logjike antikombëtare qeverisëse dhe aspak nuk është e rastësishme, pse nga Peja”, ka shkruar Haradinaj, duke shtuar se “Kosova është përcaktuar në rrugën e vet euroatlantike dhe partneriteti me aleatët, veçmas me Amerikën”.