Të hënën, ministri i Punëve të Jashtme të Rusisë, Sergey Lavrov, ka dhënë një intervistë për mediumet serbe, ku ishte shprehur se Rusia është e gatshme të shqyrtojë një takim me Ukrainën në qytetet e tjera, duke përfshirë edhe Beogradin.
Sipas Lavrov-it, Beogradi është vend i mirë për bisedime të paqes me Ukrainën, dhe se për Rusinë do të ishte i pranueshëm.
“Vendi i negociatave duhet të jetë i pranueshëm për të dyja palët. Ne kemi mbajtur tre raunde bisedimesh ballë për ballë në Bjellorusi, pastaj ka pasur edhe disa video konferenca’’.
‘’Tashmë është arritur një marrëveshje për takimin e Stambollit, e cila pasqyron një pikë gjeografike, në të cilën mundësitë e të dyja palëve kanë përkuar. Edhe pse ne jemi të gatshëm të shqyrtojmë lokacione të tjera, përfshirë Beogradin”, deklaroi kreu i diplomacisë së Federatës Ruse.
Nga ana tjetër, Presidenti i Ukrainës, Volodymir Zelenskyy, ka kohë që po kërkon bisedime të drejtpërdrejta me presidentin e Rusisë, Vladimir Putin, dhe së fundi ka thënë se këto bisedime nuk bën të mbahen në Rusi e Ukrainë e as në Bjellorusi, sikurse deri më tash.
Më herët gjatë ditës, Dimitry Peskov, një zëdhënës i presidentit të Federatës Ruse, tha se negociatat midis delegacioneve ruse dhe ukrainase në Stamboll ka shumë të ngjarë të mbahen nesër, më 29 mars.
Serbia është ndër të paktat shtete evropiane që ka refuzuar t’i bashkohet Perëndimit për sanksione ndaj Rusisë, të cilat i janë vënë, si pasojë e pushtimit që e ka nisur më 24 shkurt ndaj Ukrainës. Fluturimet ajrore në mes të Evropës dhe Rusisë janë ndërprerë, si rezultat i sanksioneve të vendosura.
Serbia është i vetmi vend evropian që ka linja të rregullta të fluturimeve me Rusinë dhe se nuk është pajtuar të vendosë sanksione në pajtim me Bashkimin Evropian.
