Kryeministri në detyrë, Albin Kurti, ka thënë se në takimin me kryetarin e Lidhjes Demokratike të Kosovës, Lumir Abdixhiku, ka parë vullnetin e LDK-së për të arritur një marrëveshje për zgjedhjen e presidentit të ri të Kosovës.
Pas takimit, Kurti e ka cilësuar diskutimin si konstruktiv, duke thënë se palët kanë diskutuar për kriteret që duhet t’i përmbushë figura e presidentit apo presidentes.
“Takimi shkoi në atmosferë konstruktive edhe e pashë vullnetin e LDK-së që vendit t’ia sjellim një president të ri që nuk ka nevojë për zgjedhje të reja, që duhet të sigurojmë funksionim demokratik të shtetit dhe që për këtë duhet të ndërtojmë mirëbesim”, tha Kurti.
Ai bëri të ditur se gjatë takimit është diskutuar nga disa këndvështrime për profilin e presidentit të ardhshëm, duke përfshirë vlerat, meritat dhe kontributet e mundshme të kandidatit.
Sipas Kurtit, vullneti për arritjen e një marrëveshjeje duhet të jetë arsye për optimizëm lidhur me tejkalimin e ngërçit politik.
Ky ishte takimi i katërt ndërmjet përfaqësuesve të Lëvizjes Vetëvendosje dhe LDK-së në përpjekje për të arritur një marrëveshje politike për tejkalimin e krizës institucionale.