Selektori i Kosovës, Franco Foda, ka marrë një vendim befasues para ndeshjes së sontme ndaj Izraelit, duke lënë jashtë 23-shes Baton Zabërgjën, Vesel Demakun dhe Leard Sadriun.
Befasia më e madhe është lënia jashtë e Zabërgjës, i cili ishte titullar në dy ndeshjet e para të Kosovës në këtë edicion të Ligës së Kombeve, ndaj Irlandës dhe Austrisë.
Anësori 25-vjeçar këtë herë do ta përcjellë ndeshjen nga tribunat.
Demaku dhe Sadriu, ndërkohë, nuk janë aktivizuar në këtë grumbullim.
Për ndeshjen ndaj Izraelit, në skuadër është rikthyer Leon Avdullahu, të cilit iu desh të largohej për një ditë nga grumbullimi.
Kosova përballet sonte me Izraelin në Debrecen të Hungarisë, me fillim nga ora 20:45.
“Dardanët” vijnë në këtë takim pas fitores ndaj Irlandës në Prishtinë dhe humbjes në udhëtim ndaj Austrisë, në kuadër të Ligës B të Ligës së Kombeve.