E njëjta rrugë të çon tek dy objekte fetare, bëhet fjalë për Janjevën e Lipjanit, ku në këtë vend banorët nuk e kanë problem ezanin e Xhamisë e as kambanën e Kishës.
Përveç tolerancës fetare këtu kafja e mëngjesit i bashkon pesë komunitete, shqiptarë, kroat, rom, ashkalinj e turq.
Skender Bikliqi që i përket komunitetit turk tregon për bashkëjetesën në këtë vend.
“Probleme nuk ka, barazia është shumë mirë, është vend multietnik, ka shumë komunitete, problem nuk kemi, kemi një gjuhë të përbashkët. Bashkëpunim kemi nonstop edhe Janjeva akoma e ka kulturën e bashkëpunimit ashtu siç ka qenë më herët,” u shpreh Bikliqi.
Probleme nuk kanë as komuniteti rom.
“Këtu është shumë mirë, kalojmë shumë mirë, si me kroat si me rom gjithmonë kemi kaluar mirë,” ka thënë qytetari i Janjevës, Asret Asllani.
E shqiptari, Adem Mustafa thotë se ritet fetare i bashkojnë edhe komunitetet aty.
“A po e sheh në Xhami vimë bashkë, vetëm kroatët që shkojnë në kishë se me këta tjerët krejt bashkë këtu i kemi,” tregoi Mustafa.
Shumica e banorëve në këtë vend janë shqiptarë, ndërsa 480 banorë i përkasin komunitetit turk, 230 kroatë dhe 220 komuniteti rom.