Ministria e Shëndetësisë e Republikës së Kosovës, përmes një postimi në rrjetin social ‘Facebook‘, u ka bërë thirrje qytetarëve që të vaksinohen kundër Coronavirusit, në mënyrë që të mbrohen nga komplikimet.
Sipas një studimi nga Qendra për Kontrollin dhe Parandalimin e Sëmundjeve (CDC-SHBA), është konstatuar se, rreziku i komplikimeve të zemrës ishte më i lartë pas marrjes së infeksionit COVID-19, sesa pas marrjes së një ose më shumë dozave të vaksinave mRNA COVID-19 (Pfizer-BioNTech ose Moderna).
”Një studim i Qendrës për Kontrollin dhe Parandalimin e Sëmundjeve (CDC-SHBA) ka gjetur se, rreziku i komplikimeve të zemrës, si miokarditi (inflamacion i muskujve të zemrës), ishte më i lartë pas marrjes së infeksionit COVID-19, sesa pas marrjes së një ose më shumë dozave të vaksinave mRNA COVID-19 (Pfizer-BioNTech ose Moderna), te të dy gjinitë dhe te të gjitha moshat”
”Studimi ka gjetur se të rinjtë e moshës 12 – 17 vjeçe ishin dy deri gjashtë herë më shumë të rrezikuar për komplikime në zemër pas infeksionit me Covid -19 sesa pas vaksinimit, kurse personat e moshës 18 – 29 vjeç ishin shtatë deri tetë herë më të rrezikuar nga komplikimet në zemër pas infeksionit me COVID – 19, sesa pas marrjes së vaksinës kundër COVID – 19. Vaksinat ndihmojnë në mbrojtjen kundër COVID-19 dhe komplikimeve”, thuhet postimin e MSH-së.
Tutje, thuhet se në Kosovë, të gjithë personat e moshës 12 vjeç e më lart duhet të vaksinohen kundër coronavirusit dhe të kujdesen që ta kompletojnë vaksinimin, sepse “me kalimin e kohës bie imuniteti i fituar nga dozat paraprake të vaksinimit”.
Sipas të dhënave nga Instituti Kombëtar i Shëndetësisë Publike të Kosovës, që nga fillimi i procesit të vaksinimit, gjithsej, janë administruar 1 milionë 824 mijë e 555 doza të vaksinës. Deri më sot, 821 mijë e 432 qytetarë janë vaksinuar me dozën e dytë. Po ashtu, janë dhënë 100 mijë e 902 doza përforcuese dhe doza të treta të vaksinës kundër COVID-19.
