Zëvendësministri i Mjedisit, Planifikimit Hapësinor dhe Infrastrukturës, Hysen Durmishi, ka njoftuar për fillimin e punimeve të projektit “Zgjerimi i rrugës nacionale N9-Segmenti Kijevë – Zahaq”.
Durmishi ka bërë të ditur se kjo rrugë po zhvillohet me një planifikim dhe përgatitje gjithëpërfshirëse, duke theksuar kursim të buxhetit për 150 milionë euro nga buxheti i Kosovës.
“Rruga Kijevë – Zahaq, po bëhet pa zvarritje dhe me cilësi në investime, planifikim e përgatitje gjithëpërfshirëse, e me kursim të buxhetit nga 240 milionë euro sa ishte planfikuar në të kaluarën, sot do të kushtojë më pak se 90 milionë euro, pra po i kursejmë plot 150 milionë euro buxhetit të Kosovës”, ka shkruar Durmishi.
Ai ka thënë se shpronësimet për segmentin e parë kanë përfunduar deri në Dollc, ndërsa në Qeverinë e Kosovës është miratuar shpronësimi i segmentit tjetër nga Dollci deri në Zahaq.
Durmishi gjithashtu ka theksuar përparimin e shpejtë të punimeve në rrugën për në Pejë, duke shtuar se janë në fazën e fundit të hartimit të projektit për zgjerimin e rrugës nga Istogu në Prizren, duke kaluar përmes Pejës, Deçanit dhe Gjakovës.
Po ashtu, edhe kryeministri i Kosovës, Albin Kurti, ka marr pjesë në fillimin e punimeve të projektit, ku ka thënë se ky zgjerim i rrugës do të bëhet në tri llote me gjithsej 10.9 kilometra gjatësi.
Ai ka njoftuar se ky projekt do të kushtojë rreth 21 milionë euro.