Policia e Kosovës, me qëllim të ruajtjes së rendit dhe qetësisë publike si dhe mbarëvajtjes së protestës së paraparë të mbahet sot në orën 14:00 në Prishtinë, ka bërë përgatitjet e nevojshme operacionale policore.
“Policia e Kosovës e njeh të drejtën e shprehjes së lirë, pakënaqësive (protestës) si e drejtë ligjore. Lidhur me këtë PK-ja, ka filluar me kohë përgatitjen dhe ndërmarrjen e masave që kanë për qëllim mbarëvajtjen e protestës, ruajtjen e rendit dhe sigurisë publike, ofrimin e sigurisë për qytetarët, mbrojtjen e pronës dhe ofrimin e sigurisë në trafik”, njofton Policia e Kosovës.
Në njoftimin e tyre thuhet se do të ndërmarrin masat e nevojshme preventive, operative policore për të siguruar që mbarëvajtja e protestës të kalojë pa ndonjë incident, që pjesëmarrësit në protestë të shprehin qëllimin e tyre në mënyrë demokratike dhe në suaza ligjore.
“Sipas procedurave të parapara policia do të merr masa dhe do të shtojë aktivitetet operative para, gjatë dhe pas përfundimit të protestës”, vijon njoftimi.
Policia ka ftuar qytetarët, pjesëmarrësit në protestë që protesta të zhvillohet e qetë duke respektuar ligjet e vendit, dhe që kërkesat e tyre t’i shpalosin në mënyrë demokratike e ligjore.
Partia Socialdemokrate (PSD) fton qytetarët të marrin pjesë në protestë këtë të shtunë, në orën 14:00, në sheshin “Zahir Pajaziti” në Prishtinë, si shenjë mospajtimi për marrëveshjen e arritur në Ohër të Maqedonisë së Veriut.
PSD fton qytetarët në protestë të shtunën: Marrëveshja e propozuar nga BE-ja, e dëmshme për Kosovën