Aspirata shumë vjeçare e Kosovës për t’u bërë pjesë e familjes evropiane është hedhur në letër të mërkurën.
Presidentja Vjosa Osmani, kryetari i Kuvendit Glauk Konjufca dhe kryeministri Albin Kurti kanë nënshkruar aplikimin për anëtarësim në Bashkimin Evropian.
Ky veprim është vlerësuar si historik nga udhëheqësja e shtetit.
“Ne jemi të vendosur që t’ia dalim me sukses. Ne do ta bëjmë pjesën e punës në mënyrë që BE-ja ta ketë më lehtë rrugën e vet. Ne po bëjmë hap historik që BE-ja të lëvizë sa më shpejt drejt vendimit historik”, ka deklaruar Vjosa Osmani, Presidente e Republikës së Kosovës.
Marrja e statusit të vendit kandidat ka peshë të konsiderueshme sipas kryeparlamentarit Konjufca, i cili tha se kjo vlerësohet edhe si vula e parë e perspektivës evropiane.
Andaj, ai kërkoi reflektimin e institucioneve evropiane karshi kërkesës së Kosovës.
“E ftojmë Parlamentin Evropian, Këshillin Evropian, Komisionin Evropian dhe shtetet anëtare të BE-së që ta demonstrojnë përkushtimin dhe përkrahjen e tyre ndaj Kosovës, por edhe të gjitha vendeve të Ballkanit Perëndimor, duke e miratuar unanimisht kërkesën e Kosovës për anëtarësim dhe në këtë mënyrë të na inkurajojnë të gjithëve që të t’i ndërmarrim reformat e nevojshme”, ka deklaruar Konjufca.
I vetëdijshëm për kohën që do të marr e vështirësitë që mund të dalin rrugës është edhe kryeministri Kurti.
Por, ai beson në tejkalimin e sfidave.
“Progresi do të varet nga përkushtimi ynë për reforma të thella dhe transformuese të cilat e avancojnë demokracinë, e forcojnë sundimin e ligjit dhe e zhvillojnë ekonominë tonë. Shpejtësia me të cilën do të ecim do të varet nga ne. Prandaj, angazhimi i të gjithëve është i nevojshëm e përkushtimi i secilit, i domosdoshëm”, ka deklauar Kurti.
Ceremonia ka përkuar me 4-vjetorin e miratimit të ligjeve që i hapën rrugë transformimit të Forcës së Sigurisë së Kosovës në ushtri.
Aplikimi pritet që të enjten t’i dorëzohet zyrtarisht presidencës Çeke të BE-së, në Pragë.