Të premten e 22 korrikut, deputetët e Lëvizjes Vetëvendosje(VV) kanë lëshuar mbledhjen e Komisionit Hetimor Parlamentar për krizën energjetike, ku po intervistohej Ministri i Financave, Punës dhe Transfereve, Hekuran Murati.
Krejt kjo erdhi pasi deputeti i Partisë Demokratike të Kosovës(PDK), Ferat Shala e quajti spekulante shefen e Grupit Parlamentar të VV-së, Mimoza Kusari-Lilën.
Debati nisi kur deputetja Kusari-Lila komentoi njërën nga pyetjet e Shalës ndaj ministrit Murati, duke e quajtur ‘pyetje spekulative’.
Ndërsa Shala iu kundërpërgjigj deputetes Kusari-Lila, “ulu ku je aty”.
“Pyetje spekulative unë thashë, jo që ju jeni spekulant. Nuk pranoj as etiketime as urdhra nga asnjë. Kjo është e tepruar. Në momentin që do të ketë ofendime të deputetëve ne nuk do të marrim pjesë. Ofendimet nuk ia kam borxh askujt”, ka thënë Mimoza Kusari-Lila.
Rrjedhimisht, në mungesë kuorumi ka përfunduar edhe mbledhja e komisionit, ndërsa opozita e ka cilësuar të qëllimshme ndërprerjen e kësaj mbledhjeje duke e quajtur strategji të Kusari-Lilës.
Ndërkaq, ministri Murati gjatë raportimit në këtë komision për krizën energjetike, ka thënë se është e domosdoshme ndarja e mjeteve buxhetore për subvencionimin e importit të energjisë elektrike.
“Çmimet e larta të importit dhe rënia e bllokut Kosova B, shtojnë nevojën për subvencionim të energjisë”, ka thënë ai.
Po ashtu ai para deputetëve ka treguar edhe kur është informuar për krizën energjetike vitin e kaluar.
